Proclamatie veur de vastelaovend in ‘t jaor 2010

 

Biê de grasie van de Wiêze Raod, gebaore ès Flaris oêt Gelaen, getrouwd mit ’n maedje gebörtig oet ‘t Katerriêk, höb ich, Paul Janssen, de eër òm in ´t jaor 2010 mit de vastelaovend te maoge regeere euver ‘t Louverriêk Buchte. Mit de goodkööring en volleedige òngersjteuning van miên Prinses Katinka belaof ich biê deeze plechtig alles te doon, wat van eine gooje Prins maog waere verwach en proclameer ich biê deeze, in het biêzeen van uch allemaol, ès Prins Paul IV van ’t Louverriêk Buchte, de volgende puntje:

 

Ten eërste:

Det buurtvereeniging “ ’t Centrum” nao ein paar jaor, weer èns ein prinsepaar in de buurt haet. Ze maoge zich dan auch in 2010 ‘n keuninklikke buurtvereeniging neume. Ich num dan auch aan det de buurtvereeniging deze kieër bezunjer gruëtsj is òm dit keuninklik predikaat weer te maoge drage.

 

Ten tweëde:

Det ich de jonges en maedjes van ’t Keuninklik Auwt Viêfde dit jaor vraog om hunne keuninklikke tietel opnuuj waor te make. Ich proclameer dan auch det ich van uch verwach det geer biê jedere vastelaovesaktievieteit in Buchte aanwezig zult zeen en det geer ein aktieve biêdrage aan die aktievieteit zult levere.

 

Ten driêde:

Det ich ’t fantasties vènj det ’t Keuninklik Auwt Viêfde auch dit jaor weer eine sjlager haet gemaak. Ich vènj ’t persuënlik waal errug jaomer dèt ‘r noê al zwa vreug klaor waor. Normaal gesjpraoke hèjje ze nog de tiêd gehad om de teks te verangere en hun eige prinsepaar d’rin te verneume.

 

Ten veerde:

Det ich ès proofesjonele verboewer de Louvermen, ès kulinaire vereiniging, tot deens zou kènne zeen. Ich höb ein paar jaor geleje namelik rondj de 11 de van de 11 de ein restaurant verboewt det ongertössje al twae sjterre haet. Ès zie mich veuraaf aangaeve det ’r get gegaete zal gaon waere, zorg ich d’r veur, mit de jonges ès handjlangers, det veer die twae sjterre gemekkelik euvertreffe.

 

Ten viefde:

Det mien leef Prinses Katinka, ès aafgesjtudeerd directiesekretaresse, ein gedeilte van de sekretariële take van de Louvermen op zich zal numme. Hierdoor wurd hunne sekretaris Jo Ramakers dit jaor ontlas, zodet hae zich gans kènt sjtorte op zien 1 x 11 jaorig jubileum biê Karnevalsvereiniging De Louvermen.

 

Ten zösde:

Det ‘t mich ès auwt sjpeler van Fortuna Zitterd aan ’t hart geit, det zie biênao hèjje motte fuzere mit Roda oêt Kirchroa en Sporting Limburg hèjje gewore. Daorom koodsj ich mit vööl enthousiasme ’t jonge talent det biê Fortuna rondjlöp. Zie zulle ‘t echter de komende vastelaovestiêd soms zonger mien koodsjende kwaliteite motte doon. Maer nao essjelegoonsdig gaon ich ekstra hèl mit de jonges van de D2 aan de sjlaag zwa det mien klupke bènne 11 jaor Champions League môt kènne sjpele.

 

Ten zevende:

Det ich oet naam van mien Prinses Katinka vraog aan de maedjes van de vrouwluujsjötterie om op ein of anger meneer mit te laupe in de vastelaovesoptoch. Zie motte dit dan ès generale repetisie zeen veur de sjötteoptoch in augustus wo zie haoge auge wille gaoije. Zie kènne zich dan noê al van hunne beste kandj laote zeen. Mien Prinses zal dees maedjes belaone mit de eërste priês veur de beste houding in de optoch.

 

Ten achste:

Det ich alle Louvermenkes en Louverwiêfkes oproop òm veural aktief te bliêve deilnumme aan de versjillende vastelaovesaktievieteite in ‘t Louverriêk. Om uch ’t gooje veurbeeld te gaeve zal ich d’r persuënlik veur zörge det de jonges van de “Wieze Raod” ein passende ekt zulle brenge op het 3 x 11 jaorig jubileum van de Buchter Revue. In de hoofrol sjteit de 1 x 11 jaorige jubilaris van Karnevalsvereiniging De Louvermen, Wil Michiels ès Louverkater.

 

Ten neugende:

Det de twae euvergebleve kepelle noê veural neet mòtte dènke, det ziej dit jaor neet aan de bak hoove omdet ze gein hofkepèl zeen. Intaegedeil, ich vraog aan die twae kepelle om dit jaor ekstra van zich te laote heure. Maak vööl kèbaal, rempetemp en meziek en zörrig oppe tiêd veur eine hèlle toesj.

 

Ten tieënde:

Det ich ’t altiêd biêzunjer sjiek venj wie de vastelaovesvierders oet ’t Louverriêk zich kènne verkleije. Daorom roop ich jederein op om det onger angere tot uting te brenge op ‘t 2 x 11 jaorig jubileum van ’t Klonebal. Passend bènne ’t thema “Sjaonste kloonspaar 2 x 11” zeen d’r zat ideje te bedenke om aan deze gezellige aovend mit te doon. Degene, dae ’t thema ’t sjoanste wèt oêt te beelde, wurd door mich persuënlik in ’t vastelaoveszunke gezat.

 

Ten ellefde:

Mit uch allemaol wille weer vastelaovend viere, handj in handj,

same trèkke door òs sjoane Louverlandj.

Vastelaovend, 't feës veur jòngk en awt, groat en klein,

doot allemaol mit, maak sjpas en plezeer, mit jeederein.

Verklei uch bòntj en laote w'r same zènge,

En òs bènne de korste keëre de lappe ònger de sjoon oêt sjprènge,

Vastelaovend is weer dao, de kop is d’r aaf,

neemes hilt òs noê meër taege,

 

Louvermen, Alaaf, Alaaf, Alaaf.

 

Aldus opgemaak te Buchte, de 9e jannewarie 2010

P rins Paul IV, Prinses Katinka, Vors Jeroen en de Wiêze Raod