Proclamatie veur de vastelaovend in ‘t jaor 2008

Biê de grasie van de Wiêze Raod, gebaore es rasechte Louvermân, getrouwd mit ’n maedje ôet ‘t riêk van de Vreigeleërs, höb ich, Prins Roger 1, de eër òm in ´t jaor 2008 mit de vastelaovend te maoge regeere euver ‘t Louverriêk Buchte. Mit de goodkööring en volleedige òngersjteuning van miên Prinses Mascha belaof ich biê deeze plechtig alles te doon, wat van eine gooje Prins maog waere verwach en proclameer ich bie deeze, in het biêzeen van uch allemaol, es Prins Roger 1 van ’t Louverriêk Buchte, de volgende puntje:

Ten eërste:
Dat buurtvereeniging “’t Anker” nao lange tiêd, eindelik weer èns ein prinsepaar in de buurt haet. Ze maoge zich dan auch in 2008 ‘n keuninklikke buurtvereeniging neume. Ich num dan auch aan det de buurtvereeniging nao zoa vööl jaor bezunjer gruëtsj is òm dit keuninklik predikaat weer te maoge drage.

Ten tweëde:
Det ich ’t Keuninklik Awt Viêfde mit ingangk van vanaovend vraog òm hunne keuninklikke tietel waor te maake. Dit kènt g’r doon, door biê jedere vastelaovesaktievieteit in Buchte wò weer ès prinsepaar versjiêne, auch aanwezig te zeen. Ich verwach det g’r euveral aan zult mitdoon op ein meneer, die biê ’t Keuninklik Awt Viêfde pas.

Es g’r de ganse vastelaovend aan dees verwachtinge voldoot, zulle miên prinses en ich d’r veur zörge, det g’r ònger d’n optoch geine doosj liêjt.

Ten driêde:
Det w’r ’t Keuninklik Awt Viêfde oêtdaage òm zeker auch in òs regeerperiejode de Aaftrap van de vastelaovend 2009 veur hun raekening te numme. Deze aovend waor òs es aansjtaond prinsepaar good bevalle. W’r zègge uch dan biê deze toe dèt weer dan es ech prinsepaar saame mit de Wiêze Raod van ‘De Louvermen’ biê de volgende aaftrap van de vastelaovend aanwezig zulle zeen.

Ten veerde:
Det de veterane van R.K.V.V. Buchte in de vastelaovestiêd ’t waarsjienlik zònger miên onnavolgbaare, door de koodsj zjwaor òngersjatte, voetbalkwalieteite mòtte doon. Ich zal natuurlik in gedachte jedere wedsjtriêd biê uch zeen. Mer òm uch auch aan mich te laote dènke, vraog ich de jònges van de veterane òm jedere gool te viêre mit ‘n krachtig driewerf “Louvermen Alaaf”.

Ten viefde:
Det ich es gewaerdraeger biê de sjötterie en miên prinses es lid van de vrouwluujsjötterie opdraag aan dees vereiniginge òm zich ònger d’n optoch weer saame te pakke. Hiedoor sjtaot g’r heël sjterk mit deze groate groep, sjus zoawie mit ’t gesjlaagde jubileumfeës. Messjien lök ’t uch zellefs waal òm d’r veur te zörge det de mansluuj van de Sjöttekèpel d’n optoch dit jaor gans oêtlaupe.

Ten zösde:
Det ich d’r-op raeken det miêne baas, Vos Logistics, d’r veur zörg det de optoch in Buchte ekstra wurt opgepimp. Ich zal häöm dan auch vraoge om jedere wage dae mittruk in d’n optoch te veurzeen van road-gael-greune velge.

Ten zevende:
Det ich bès sjnap det door ’t groate aantal verangeringe biê ‘De Louvermen’ sommige luuj d’n draod ‘n bietje kwiêt zeen. Ich bèn dan auch zeker bereid òm aan jederein ònger ’t genot van ‘n lekker glaas beer dudelikheid dao-euver te versjaffe. Es ’t mòt teiken ich ’t uch auch nog oêt op ’n beerviltje, uiteraard waal pas biê ’t volgende glaas beer.

Ten achste:
Det ich jederein wil laote kènnismaake mit de oêtzunjerlikke broewkwalieteite van miên prinses. Ich höb häör dan auch gevraog òm veur de vastelaovend ‘n heilzaam Louverdrènkske te broewe. De jònges van de Wiêze Raod zulle de eër höbbe òm veur te preuve. ‘t Bèste broewsel zal door hun waere oêtgekaoze en zal ’t ganse sezoên ‘t prinselik predikaat drage.

Es g’r dan mit die daag èns get sjlap oppe bein zeet, mòt g’r miên prinses Mascha mer vraoge veur ‘ne sjlòk van dit wònjerdrenkske.

Ten neugende:
Det ich jederein oproop òm aktief mit te doon aan jedere vastelaovesaktievieteit in “’t Louverriêk”. Miên prinses en ich zouwe ’t prachtig vènje òm zoavööl meugelik saame mit uch vastelaovend te viêre. Òm auch de jònge Louvermenkes en Louverwiêfkes oêt te daage en òm ’t gooje veurbeeld te gaeve, zal ich d’r persuënlik veur zörge det de Raod van Èllef ‘n swingende ekt verzörg biê de Mini-Maxi pleebèksjoo op vastelaovesdeensdig.

Ten tieënde:
Det m’n leef Prinses Mascha es proofesjoneel zörgverleënsjter op essjelegoonsdig vermoedelik alles oêt de kas zal mòtte haole òm mich de res van de waek leefdevol te verzörge.

Ten ellefde:
Mit uch allemaol wille weer vastelaovend viere, hanjd in hanjd,
same trèkke door òs sjoane Louverlanjd.

Vastelaovend, 't feës veur jòngk en awt, groat en klein,
doot allemaol mit, maak sjpas en plezeer, mit jeederein,

Kèpelle hauw op die kis en gaot veur òs oêt,
mit ‘n trööt oppe nak of ‘n tròm òm de boêk.

En höbste èns get lang aan d’n teek gesjtange,
laot dan thoês waal de radiejater aan de moêr hange.

Vastelaovend is weer dao, de kop is d’r vanaaf,
neemes hilt òs noê meër taege,

Louvermen, Alaaf, Alaaf, Alaaf.

Aldus opgemaak te Buchte, de 5e jannewarie 2008,

Prins Roger 1, Prinses Mascha, Vors Jeroen, Besjermheër Wil en de Wiêze Raod